252 વૈષ્ણવોની વાર્તા.
વાર્તા 19 મી. વૈષ્ણવ 19 માં. શ્રી ગુસાંઇજીના સેવક માધવદાસક્ષત્રી ની વાર્તા.
પ્રસંગ 1 લો :- એ માધવદાસ કાબુલમાં રહેતા હતા. એક વખત ભૈયા રુપમુરારી દેશાધિપતી ની સાથે કાબુલ ગયા. ત્યાં બજારમાં માધવદાસને માથે તિલક જોઈને પૂછવા લાગ્યાં. "તમે કોણ છો ? અને આ તિલક કેમ કર્યું છે ?" ત્યારે માધવદાસે કહ્યું" હું શ્રીગુસાંઇજીનો સેવક છું " રુપમુરારીએ કહ્યું "હું પણ શ્રીગુસાંઇજીનો સેવક છું. " ત્યારે માધવદાસ ઘણા પ્રસન્ન થયા. એટલામાં માધવદાસ ઉઠીને આંચળ ફેરવવા લાગ્યા. ત્યારે રુપમુરારીએ પૂછ્યું "આ શું છે " ત્યારે તેમણે કહ્યું શ્રીનાથજી ગાય ચરાવીને વ્રજમાં પધારે છે તેથી આંચળ વારુ છું " ત્યારે રુપમુરારી એ સાંભળીને ઘણા વિસ્મય પામ્યા. એવું આશ્ચર્ય થયું કે શ્રીનાથજી એમને અહીંયા દર્શન દે છે ! ત્યારે મનમાં એમની ઘણી સરાહના કરી. માધવદાસે શ્રીનાથજીનો જે શૃંગાર કહ્યો તે રુપમુરારીએ લખી લીધો. પછીથી માધવદાસને ઘેર જઈને શ્રીઠાકોરજીના દર્શન કર્યાં. તો સાક્ષાત શ્રીગોવર્ધનનાથજી નાં દર્શન થયાં. અને મનમાં કહ્યું કે "મારુ મોટું ભાગ્ય છે. કે જો કે મ્લેચ્છ દેશમાં છું છતાં પણ મને આવો વૈષ્ણવનો સંગ થયો. " ફરીથી કેટલાક દિવસ રહીને ચાલવા લાગ્યા. માધવદાસે કહ્યું " તમે થોડા દિવસ રહો. એ પૃથ્વીપતિ ( બાદશાહ ) વીસ મજલ જશે તો હું તમને એક દિવસમાં પહોંચાડી દઈશ. " આથી રુપમુરારી ત્યાં રહ્યાં. વીસ દિવસ પછી માધવદાસજી રુપમુરારીની સાથે ઘોડા ઉપર બેસીને પર્વતમાંથી બીજો રસ્તો શોધી કાઢયો ને 80 ગાઉ જેટલો રસ્તો એક રાતમાં પહોંચી ગયા. આ રસ્તામાં ચોર બહુ હતા, પણ માધવદાસને તથા રુપમુરારીને કોઈએ દીઠા નહીં. આખી રાત રસ્તામાં ભગવદવાર્તા કરતા કરતા આવ્યા. માધવદાસે કહ્યું "હું હરિદ્વારમાં શ્રીગુસાંઇજીનો સેવક થયો હતો." ત્યારે રુપમુરારીને ઘણું આશ્ચર્ય થયું." શ્રીનાથજી વ્રજલીલા સહિત એમને દર્શન દે છે. તેથી તેમની ઉપર શ્રીગુસાંઇજીની ઘણી કૃપા છે. ત્યારે માધવદાસ રુપમુરારીથી વિદાય થઈને પોતાને ઘેર આવ્યા. એ માધવદાસ એવા કૃપાપાત્ર હતા. તેમને શ્રીનાથજી કાબુલમાં નિત્ય દર્શન આપતાં હતા. વાર્તા સંપૂર્ણ. વૈષ્ણવ 19 માં.
(સાર) પ્રભુતો કેવળ ભાવને વશ છે. સાધનને વશ નથી. નંદદાસજીએ પણ એવું કહ્યું છે.
યદ્યપિ અગમ તેં અગમ હે, નિગમ કહત હૈં જાહી;
તદપિ રંગીલે પ્રેમવશ નિપટ નિકટ હરિ આહી.
ટિપ્પણીઓ
ટિપ્પણી પોસ્ટ કરો